Áherslumál - Flokkur Fólksins Reykjavík

Áhyggjulaust ævikvöld

Gjaldfrjálst verði í bílastæði fyrir 67 ára og eldri. Ekkert app eða flækjustig.
Styðjum við efnaminnstu eldri borgarana með því að veita þeim 50.000 kr frístundastyrk sem eykur félagslega virkni og hreyfingu.
Gjaldfrjálst verði í sund fyrir 67 ára og eldri.
Stóreflum heimahjúkrun og heimaþjónustu við eldra fólk. Heimavitjanir eiga að vera einstaklingsmiðaðar og taka mið af raunverulegri þörf fólks.
Tryggjum skilvirka akstursþjónustu, næringarríkan heimsendan mat og aðgengi að öflugu félagsstarfi fyrir eldra fólk.
Blásum til stórsóknar í uppbyggingu hjúkrunarheimila og tryggjum að alltaf séu til lóðir til þess að mæta þörfinni hverju sinni.
Bindum enda á þjónustuskerðingar. Efnum loforð borgarinnar við eldra fólk í þjónustuíbúðum og studdri búsetu.
Endurvekjum hverfisráðin til að efla íbúalýðræði. Hlustum á eldri borgara með því að efla öldrunarráð Reykjavíkur til muna og virkjum notendaráð félagsmiðstöðvanna.
Rjúfum einangrun eldri karlmanna. Fjölgum virkniúrræðum á borð við „Karla í skúrum“ og eflum íþróttastarf eldri borgara.

Klárum framkvæmdir í Úlfarsárdal, flýtum uppbyggingu í Keldnalandi og víkkum vaxtamörk borgarinnar/höfuðborgarsvæðisins fyrir ný hverfi.
Eflum samstarf við óhagnaðardrifin byggingarfélög og aukum framboð af hagkvæmum íbúðum í Reykjavík.
Tryggjum að nýjum íbúðum fylgi nægjanlegur fjöldi bílastæða. Skortur á stæðum skapar mikil vandamál í grónum hverfum.
Hröðum uppbyggingu Sundabrautar sem opnar á framtíðaruppbyggingu svæða eins og Geldinganesi, Gunnunesi, Álfsnesi og á Kjalarnesi.
Vindum ofan af ofurþéttingu byggðar. Leggjum áherslu á mannvæna hönnun, græn svæði og ríkar kröfur um birtu og hljóðvist þegar ný hverfi og ný byggð eru skipulögð.
Styttum biðlista Félagsbústaða og mætum fjölbreyttum húsnæðisþörfum fólks. Tryggjum að dagsetur sé til staðar fyrir alla heimilislausa, alla daga vikunnar.
Stöðvum lóðabrask í borginni. Aukum framboð af lóðum á sanngjörnu verði, setjum skýrari tímamörk á uppbyggingu og herðum reglur um endursölu óbyggðra lóða.
Aukum framboð húsnæðis með því að stöðva útgáfu rekstrarleyfa fyrir gististaði í flokki II fyrir atvinnurekna skammtímaleigu á borð við Airbnb.

Innleiðum árangursríkar lestraraðferðir á borð við Kveikjum neistann og stóreflum ÍSAT kennslu (íslensku sem annað tungumál).
Stórbætum aðgengi að greiningarferlum svo sértækur stuðningur við börn hefjist strax. Látum farsældarlögin virka og tryggjum hverri fjölskyldu sinn eigin tengilið í kerfinu.
Tryggjum jafnt aðgengi allra barna að íþrótta- og frístundastarfi óháð efnahag og lengjum tímabilið sem börn hafa rétt á frístundastyrk.
Tryggjum að grunnskólar í Reykjavík reki eigin eldhús og eldi næringarríkar máltíðir frá grunni, í stað þess að útvista matseldinni til einkafyrirtækja.
Stóraukum uppbyggingu meðferðarúrræða ungmenna í samstarfi við ríkið. Mætum vímuefna- og hegðunarvanda með snemmtækri íhlutun í skólum og frístund.
Stóraukum aðgengi ungs fólks að sálfræðiaðstoð innan skóla. Eflum ungmennahús og félagsmiðstöðvar sem mikilvæga forvörn.
Spyrnum við jaðarsetningu ungra karlmanna og mætum þeirri alvarlegu stöðu að hópurinn leiði tölfræði um sjálfsvíg, vímuefnavanda og fangelsanir.

Tryggjum 100% systkinaafslátt þannig að foreldrar greiði aðeins fyrir eitt barn í leikskóla eða daggæslu.
Bregðumst við bráðavanda leikskóla með vönduðum einingahúsum. Samhliða hefjum við langtímauppbyggingu til að rjúfa vítahring skyndilausna í eitt skipti fyrir öll.
Tryggjum öllum börnum leikskólapláss frá 12 mánaða aldri. Tökum upp heimgreiðslur til foreldra sem bíða eftir leikskólaplássi á meðan við brúum bilið.
Heimilum fyrirtækjum að reka leikskóla fyrir starfsfólk. Tryggjum að börn haldi plássinu þrátt fyrir starfslok foreldra.
Hættum mismunun á kostnaði við dagforeldra og leikskóla. Hækkum niðurgreiðslur frá 12 mánaða aldri og tryggjum dagforeldrum faglega ráðgjöf að danskri fyrirmynd.
Opnum sameiginleg leikrými fyrir dagforeldra. Það skapar skemmtilegri dag fyrir börnin og tengslanet svo dagforeldrar geti leyst hvort annað af í veikindum eða fríum.

Nýtum endurskoðunarákvæði í samgöngusáttmála sveitarfélaga til að stöðva að þrengt sé að einkabílnum á stofnæðum.
Fjölgum bílastæðum í stað þess að fækka þeim. Það sækja ekki allir þjónustu í strætó eða á hjóli.
Fjölgum göngubrúm og undirgöngum í stað gönguljósa við fjölfarnar götur. Þannig greiðum við fyrir umferð og stóraukum öryggi gangandi og hjólandi.
Innleiðum snjallstýrð umferðarljós um alla borg til að bæta umferðarflæði. Bílaraðir eiga ekki að myndast við rauð ljós á auðum gatnamótum.
Vindum ofan af græðgisvæðingu og flækjustigi bílastæðakerfisins. Tökum til í app-frumskóginum, lækkum óhófleg gjöld og styttum gjaldskyldutímann að nýju.
Sópum og hreinsum götur borgarinnar oftar og drögum úr svifryki.
Drögum úr umferðarteppum með því að ljúka viðræðum við stóra vinnustaði og skóla um breytingu á upphafstíma vinnu og vaktaskipta.
Tryggjum Reykjavíkurflugvöll áfram í Vatnsmýrinni. Við styðjum byggingu nýrrar og betri flugstöðvar þar til og ef nýr innanlandsflugvöllur verður byggður.
Fjölgum stæðum fyrir rafskútur og tryggjum að þeim sé skilað þangað, svo þær liggi ekki eins og hráviði um alla borg.

Stöðvum útþenslu báknsins með því að frysta ráðningar á skrifstofum borgarinnar. Beinum fjármagninu í að efla framlínustörf og stórbæta grunnþjónustu.
Innleiðum nýja og lausnamiðaða þjónustumenningu hjá borginni. Minnkum skriffinnsku með því að straumlínulaga leyfisferla og setja ströng tímamörk á afgreiðslu mála.
Skerum markvisst niður ferðakostnað og drögum verulega úr utanlandsferðum kjörinna fulltrúa og embættismanna borgarinnar.
Stöðvum bruðlið í stafrænum málum borgarinnar. Eflum samstarf við önnur sveitarfélög og Stafrænt Ísland til að samnýta lausnir fyrir rafræna þjónustu.
Öll innkaup borgarinnar verða samræmd í gegnum sameiginlegt aðfangakerfi sem tryggir yfirsýn, hagkvæmni og gagnsæi.