1. Heiti og markmið

1.1 Heiti stjórnmálasamtakanna er Flokkur fólksins. Samtökin starfa á landinu öllu en
heimilisfang og aðalstarfsstöð er í Fjörgyn 1, 112. Reykjavík.
1.2 Markmið Flokks fólksins er að berjast með hugsun, orði og vilja fyrir Íslendinga, sem
hafa orðið fyrir óréttlæti, mismunum, lögleysu og fátækt. Flokkurinn byggir á
kærleiksboðskap og berst gegn fátækt og spillingu á íslandi.
1.3 Tilgangi sínum nær Flokkur fólksins með því að bjóða fram til Alþingis og/eða
sveitastjórna í öllum kjördæmum og hafa þannig áhrif á gerð samfélagsins.

2. Félagar

2.1 Félagar geta allir orðið sem styðja grunnstefnu flokksins, sbr. grein 1.2, eru ekki
félagar í öðrum stjórnmálaflokkum á Íslandi og hafa greitt félagsgjald. Fullgildir félagar
þurfa að hafa náð 16 ára aldri.
2.2 Stjórn ákveður félagsgjöld.
2.3 Inntökubeiðnir og úrsagnir skulu tilkynntar skriflega eða með rafrænum hætti af
viðkomandi til skrifstofu Flokks fólksins.
2.4 Aðeins fullgildir félagar eiga atkvæðisrétt um málefni flokksins.
2.5 Allir sem taka sæti á framboðslista fyrir Flokk fólksins eða veljast til trúnaðarstarfa
verða að eiga fullgilda aðild að flokknum og hafa náð lögræðisaldri. Taki félagi sæti á
framboðslista annars framboðs eða gangi opinberlega til liðs við annan stjórnmálaflokk/-
samtök telst það jafnframt vera úrsögn úr Flokki fólksins.
2.6 Sé félagsmaður staðinn að því, að vinna gegn meginmarkmiðum og hagsmunum
Flokks fólksins, skal hann sviptur félagsaðild og skal það gert á stjórnarfundi með auknum
meirihluta atkvæða og félagsmanni tilkynnt það formlega.

3. Skipulag

3.1 Félagar eiga beina og milliliðalausa félagsaðild að Flokki fólksins.
3.2 Flokkur fólksins starfrækir málefnanefndir, sem hafa það hlutverk að leiða
stefnumótun og afmörkun einstakra mála og málaflokka á landsvísu, og kjördæmaráð,
sem halda utan um félagsstarf flokksins, hvert í sínu kjördæmi.
3.3 Stjórn ákveður fjölda og starfssvið málefnanefnda Flokks fólksins. Vinna
málefnanefnda er lögð til grundvallar ákvarðana er varða stefnu Flokks fólksins á
einstökum sviðum. Þegar málefnanefnd er stofnuð er henni sett erindisbréf sem afmarkar
starfsviðs hennar.
3.4 Þátttaka í starfi málefnanefnda er opin öllum félögum með samþykki formanns
nefndanna. Stjórn velur formann málefnanefnda til þess að stýra og bera ábyrgð á störfum
hverrar nefndar. Formaður hverrar nefndar ákveður tímasetningu og dagskrá funda fyrir
sína nefnd. Stjórn Flokks fólksins setur málefnanefndum starfsreglur.
3.5 Formenn málefnanefnda mynda málefnaráð sem sér um samræmingu milli
málefnanefnda og hefur umsjón með málefnavinnu flokksins. Málefnaráð kýs sér
formann, varaformann og ritara. Áður en tillaga málefnanefndar um breytingu á stefnu
flokksins er tekin fyrir á landsfundi skal málefnaráð og stjórn Flokks fólksins hvor um sig
fjalla um tillöguna og veita henni umsögn.
3.6 Kjördæmaráð skulu vera fimm: Reykjavíkurráð, Suðvesturráð, Norðvesturráð,
Norðausturráð og Suðurráð. Þau taka hvert til eins kjördæmis nema Reykjavíkurráðið,
sem nær til beggja Reykjavíkurkjördæma.
3.7 Kjördæmaráð halda uppi félagsstarfi og fjalla um málefni síns landshluta.
3.8 Stjórn Flokks fólksins setur kjördæmaráðunum og undirfélögum þeirra starfsreglur.
Stjórn kjördæmaráðs getur boðað til fundar þegar nauðsyn krefur.
3.9 Félagar í Flokki fólksins eru skráðir í það kjördæmaráð sem lögheimili þeirra segir til
um. Félagar sem eiga heimilisfesti utan lögheimilis tilkynna skrifstofu Flokks fólksins
hvaða kjördæmaráði þeir kjósa að tilheyra.
3.10 Heimilt er að stofna og starfrækja félög innan kjördæmaráða og skal þá hvert félag
taka til minnst eins sveitarfélags. Aðeins eitt félag sömu tegundar getur starfað innan
hvers sveitarfélags.
3.11 Heimilt er með samþykki stjórnar að stofna sérfélög sem starfa á landsvísu. Aðeins
eitt sérfélag hverrar tegundar getur starfað á landsvísu.
3.12 Ungliðahreyfing Flokks fólksins skal sinna málefnastarfi ungs fólks og vera rödd
Flokks fólksins í málefnum þeirra.
3.13 Öldungaráð Flokks fólksins skal sinna málefnastarfi eldri borgara og vera rödd
Flokks fólksins í málefnum þeirra.
3.14 Sérfélög skulu setja sér starfsreglur og ráða fjárhag sínum og málefnum sjálf, í
samræmi við starfshætti og stefnu Flokks fólksins og með samþykki stjórnar.
3.15 Framkvæmdastjóri annast daglegan rekstur skrifstofu Flokks fólksins og annast
félagatal í samræmi við reglur sem stjórn setur. Hann sér til þess að samþykktum Flokks
fólksins sé fylgt. Skrifstofan veitir félagsmönnum og frambjóðendum almennan stuðning
og ráðgjöf.

4. Landsfundur

4.1 Landsfundur Flokks fólksins er að jafnaði haldinn þriðja hvert ár og skal boða til hans
með minnst þriggja vikna fyrirvara með sannanlegum hætti. Stjórn Flokks fólksins getur
boðað til aukalandsfundar þegar nauðsyn krefur. Á aukalandsfundi er heimilt að hafa öll
sömu mál á dagskrá og á hefðbundnum landsfundi, en ekki skylt. Landsfundur hefur
æðsta vald í málefnum flokksins og markar heildarstefnu hans í landsmálum.
4.2 Á landsfundi skulu eftirfarandi mál ætíð tekin fyrir:
4.2.1 Kosning fundarstjóra og fundarritara.
4.2.2 Kosning þriggja manna kjörnefndar sem annast framkvæmd kosninga á fundinum.
4.2.3 Skýrsla stjórnar lögð fram.
4.2.4 Reikningar síðasta almanaksárs lagðir fram.
4.2.5 Skýrsla framkvæmdastjóra um rekstur yfirstandandi árs.
4.2.6 Skýrslur málefnanefnda og drög að ályktunum.
4.2.7 Kosning formanns.
4.2.8 Kosning varaformanns.
4.2.9 Kosning sjö meðstjórnenda og þriggja varamanna.
4.2.10 Breytingar á samþykktum Flokks fólksins.
4.2.11 Önnur mál.
4.2.12. Kosning endurskoðanda.
4.3 Einfaldur meirihluti ræður öllum málum nema breytingum á samþykktum og falli
atkvæði jafnt nær mál ekki fram. Um breytingar á samþykktum fer samkvæmt 11. kafla.
4.4 Stjórn er heimilt að innheimta þóknun fyrir funda- og kjörgögn á landsfundi.
4.5. Framboðsfrestur til formanns Flokks fólksins, varaformanns, meðstjórnenda og
varamanna, fundarstjóra, fundarritara og kjörnefndar er þar til viku fyrir landsfund.
4.6. Kosning til formanns, varaformanns, meðstjórnenda og varamanna og annarra
embætta skal vera skrifleg og leynileg. Kjörstjórn ber ábyrgð á því að útbúa kjörgögn.
Kjörnefnd ber ábyrgð á talningu atkvæða fyrir luktum dyrum.

5. Stjórn

5.1 Stjórn flokksins er skipuð af formanni, varaformanni og sjö meðstjórnendum sem
skipta með sér verkum á fyrsta stjórnarfundi, þ.á.m. starfi gjaldkera og ritara. Stjórnin
skal ákveða fundartíma. Stjórn er kölluð saman af formanni eða sex stjórnarmönnum með
tölvupósti eða á annan sannanlegan hátt. Varamenn skulu boðaðir á stjórnarfundi a.m.k.
á þriggja mánaða fresti. Stjórnin setur starfsreglur um innra starf flokksins. Fundir
stjórnar eru löglegir þegar meirihluti stjórnar er mættur.
5.2 Stjórn fer með yfirstjórn flokksins í samræmi við samþykktir þessar og aðrar reglur
flokksins. Hún ber ábyrgð á öllu innra starfi flokksins, hefur eftirlits- og úrskurðarvald
um ákvarðanir á vegum hans, hefur umráð yfir eignum og gætir þess að settum reglum sé
fylgt.
5.3 Stjórn hefur úrskurðarvald milli landsfunda um allt málefnastarf flokksins og ber að
tryggja að öll starfsemi flokksins sé í samræmi við samþykktir hans, stefnuskrá og
ályktanir landsfunda.
5.4 Firmaritun er í höndum meirihluta stjórnarinnar. Stjórn ræður framkvæmdastjóra og
veitir honum prókúru, ef um það er að ræða. Framkvæmdastjóri ræður starfsfólk á
skrifstofu Flokks fólksins.

6. Framkvæmdastjórn

6.1 Framkvæmdarstjórn flokksins er skipuð stjórn flokksins, ásamt varamönnum,
formönnum kjördæmaráða, formanni ungliðahreyfingar og öldungaráðsins eins og við
getur átt. Framkvæmdarstjórn flokksins kemur árlega saman til að fjalla um
stefnumörkun, starfsreglur og reikninga eftir að stjórn flokksins hefur samþykkt þá.
Einnig ef formaður flokksins eða 2/3 stjórnar eða 2/3 fulltrúa framkvæmdarstjórnar
boða til fundar.

7. Framboð

7.1 Uppstilling er meginregla við skipan á framboðslista. Ákvörðun um hvaða aðferð er
beitt er í höndum stjórnar.
7.2 Stjórn skal skipa oddvita framboðslista í hverju kjördæmi. Oddviti lista skal gera
tillögu að framboðslista og bera tillögu sína undir stjórn til samþykktar.

8. Þingflokkur

8.1 Þingmenn Flokks fólksins mynda þingflokkinn. Þingflokkurinn kýs sér stjórn,
skipuleggur störf sín og mótar afstöðu til mála á Alþingi á grundvelli stefnu flokksins og
samþykkta landsfunda.
8.2 Formaður og varaformaður flokksins eiga seturétt með tillögurétti á
þingflokksfundum eftir því sem við á og aðrir sem þingflokkurinn samþykkir.

9. Sveitastjórnarráð

9.1 Sveitarstjórnarráð er samstarfsvettvangur kjörinna fulltrúa Flokks fólksins í
sveitastjórnum og er til ráðgjafar um sveitarstjórnarmál. Sveitarstjórnarráð fjallar um
sameiginlega stefnumótun í málefnum sveitarfélaga í samræmi við stefnu Flokks fólksins.
9.2 Sveitarstjórnarráð er skipað öllum aðal- og varafulltrúum í sveitarstjórnum sem eru
flokksbundnir í Flokki fólksins. Fulltrúum í stjórn er heimilt að sitja fundi
sveitarstjórnarráðs og njóta þar málfrelsis og tillöguréttar.
9.3 Stjórn Flokks fólksins boðar til fyrsta fundar sveitarstjórnarráðs að loknum
sveitarstjórnarkosningum. Sveitarstjórnarráð kýs sér stjórn, mótar sér starfsreglur og
skipuleggur störf sín.

10. Fjárreiður

10.1 Reikningsár Flokk fólksins er almanaksárið. Ár hvert skal framkvæmdastjóri leggja
fram á fundi framkvæmdarstjórnar ársreikninga fyrir liðið starfsár og fjárhagsáætlun
fyrir komandi starfsár til afgreiðslu. Framkvæmdastjórn staðfestir reikninga með áritun
sinni.
10.2 Tekjur Flokks fólksins eru félagsgjöld og framlög frá einstaklingum og lögaðilum en
þó aðeins ef þeim fylgja ekki sérstakar kvaðir um ráðstöfun eða nýtingu. Einnig getur
verið um heimilaðar fjáraflanir að ræða á vegum flokksins sjálfs. Til viðbótar koma
opinber framlög til stjórnmálasamtaka.
10.3 Öllum hagnaði af starfsemi skal varið til að sinna markmiði og tilgangi flokksins, sbr.
greinar 1.2 og 1.3.
10.4 Meðferð fjármuna og reikningsskil skulu vera í samræmi við lög um fjármál
stjórnmálasamtaka og frambjóðenda sem og aðrar reglur um fjárreiður
stjórnmálasamtaka og landslög. Ársreikningar Flokks fólksins skulu endurskoðaðir af
þeim endurskoðendum eða endurskoðunarfyrirtækjum sem eru kosin til þess á
landsfundi.

11. Túlkun samþykkta og breytingar á þeim

11.1 Stjórn Flokks fólksins skal skipa þriggja manna nefnd til þess að fjalla um ágreining
sem upp kann að koma um túlkun samþykkta þessara og gera tillögu til stjórnar um
niðurstöðu.
11.2 Samþykktum þessum má aðeins breyta á landsfundi og telst breyting samþykkt ef
hún hlýtur 2/3 greiddra atkvæða. Þó getur landsfundur veitt stjórn leyfi til
bráðabirgðabreytinga milli landsfunda.
11.3 Tillögur til breytinga skulu sendar stjórn minnst hálfum mánuði fyrir boðaðan
landsfund.

12. Önnur ákvæði

12.1 Ákvörðun um slit félagsins skal taka á aðalfundi með 2/3 greiddra atkvæða og renna
eignir þess til félags, sem sinnir hjálpar- og eða líknarstarfi, sem fundurinn samþykkir.
12.2 Almenn fundarsköp gilda á fundum Flokks fólksins.

Samþykktir þessar voru uppfærðar á landsfundi flokksins þann 22. febrúar 2025