Í nýlegri grein sinni „Blóðmerar, myndbandið og frumvarp Ingu Sæland “ heldur Halldór í Holti uppi vörnum fyrir pyndingar á varnarlausum hryssum við blóðtöku og segir að myndband Evrópskra dýravelferðarsamtaka leiði alls ekkert dýraníð í ljós. „Ég bið alþingismenn og ykkur sem hafið hneykslast mest, að horfa á myndbandið aftur og meta upp á nýtt,“ segir hann og bætir við: „Ekkert af þessu er dýraníð og ætti því ekki að hneyksla.“ Með öðrum orðum telur Halldór að allt sem kom fram í þessu ógeðfellda myndbandi sé fullkomlega eðlilegt. Halldór heldur því jafnframt fram að dýralæknir hafi tekið blóðið á myndbandinu.
Sjáum þá hvað Dýralæknafélags Íslands hefur um myndbandið að segja á heimasíðu sinni: „Dýralæknafélag Íslands (DÍ) fordæmir þá ómannúðlegu meðferð á hrossum sem kemur fram í myndbandi Evrópskra dýravelferðarsamtaka um blóðmerar hér á landi. Hörku og ónærgætni sem dýrunum er sýnd er aldrei hægt að réttlæta. Skarkali, ringulreið og sú umgjörð sem sjá má í myndbandinu er einungis til að auka á streitu og hræðslu dýranna og alls ekki til þess fallið að auðvelda rekstur eða frekari meðferð.“
Halldóri finnst þungbært að hlusta á „órökstuddar fullyrðingar“ mínar og útleggingu sumra þingmanna á því sem fram kemur á myndbandinu. Ætli þau andþyngsli Halldórs séu ekki fremur léttvæg í samanburði við þann ótta sem skín úr augum blessaðra villimeranna á myndbandinu sem barðar eru miskunnarlaust til hlýðni, sparkað í þær og potað með harðri stöng þangað til þær verða vitstola af skelfingu. Það hefur aldrei verið talið mönnum til sæmdar að níðast á hryssum né öðrum dýrum. Öllu sómakæru fólki býður við slíku ofbeldi og gróði af slíku athæfi er stundum nefndur blóðpeningar.
Halldór fullyrðir að aldrei í tæp 40 ár hafi hryssum sínum orðið meint af blóðtöku á nokkurn hátt. Ef hans viðmið um nærgætni við blóðtöku úr hryssum speglast í aðförunum á myndbandinu, leyfi ég mér að vísa þeirri fullyrðingu heim í Holt.
Margir bændur hafa haft við mig samband og fordæmt það ofbeldi sem á sér stað í heimildarmyndinni. Þeir vita vel að sú háttsemi sem þar kemur fram er ekkert annað en dýraníð enda fara langflestir bændur vel með dýrin sín. Pyndingar eru aldrei réttlætanlegar, hvort sem menn eða aðrar lifandi verur eru þolendur ofbeldisins.